Самарқанд халқаро технология университети (SIUT) дунё бўйлаб машҳур бўлганлиги, бу ерда таълим ва бошқа соҳаларда эришаётган ютуқлар ҳақида эшитганлар дабдурустдан бу сўзларга ишонмаслиги мумкин. “Наҳотки, тўрт йиллик қисқа муддадда шунча мувафаққиятга эришиб бўлса-я” деб, сўзларингизга шубҳа билан қарайдиганлар бўлиши табиий. Чунки бу каби шахдам қадамлар билан тараққий қилган, юқори чўққига чиққан бошқа ОТМ бўлмаса керак?!
SIUT қўлга киритган ютуқлар ҳақида кўп гапиришим мумкин. Чунки университет ташкил этилганда, унга қадрдоним, юртимиз равнақи йўлида қилган беминнат хизматлари ва фидойилиги, камтаринлиги ва инсоний фазилатлари учун чуқур ҳурмат қиладиганим Юсуф Негматович Абдуллаев ректор этиб тайинланганлигини эшитиб, у ерга борган эдим. Шундан сўнг кўплаб хабар ва мақоллаларимда университет ва унинг жамоасининг намунали ишлари тилга олиниб келинмоқда.
ТаҳлилМедиа сайти ўз номи билан таҳлилий материлларга мўлжалланганлиги учун SIUT ютуқларини бир таҳлил қилиб кўришга уринмоқчиман. Қисқа муддатда шунча натижага эришишнинг омилини қаердан излаш лозим?
4 февраль куни Самарқанд шаҳридаги Ёшлар марказида SIUT ўзининг тўрт ёшга тўлишини тантанали равишда нишонлади. Тадбирдаги чиқишларда табрик сўзлари билан университет ютуқлари омили ҳақида ҳам дил сўзлари янгради. Келинг, қисқача тантанали кечада айтилганларнинг айримларини келтирсак.
Сўзга чиққанларнинг эгаллаб келган меқеи, салоҳиятига қараб, уларнинг айтган ҳар бир гапи қанчалик асосли ва салмоқли эканлигини тасаввур қилиш мумкин. Масалан, SIUTнинг биринчи проректори (provost) Бобби Ҳолл АҚШ олий таълим муассасаларида 40 йилдан ортиқ илмий-педагогик иш тажрибасига эга бўлиб, фаолиятининг 18 йилини Техасдаги Wayland университети президенти сифатида давом эттирган. У 2024 йилнинг август ойидан эътиборан SIUTда профессор лавозимида фаолият юритмоқда.
Бобби Ҳолл ўз чиқишида SIUT ютуқларини санаб ўтаркан, буларнинг ҳаммаси биринчи навбатда профессор Юсуф Абдуллаев фаолияти билан, унинг ташкилотчилик маҳорати ва узоқни кўра билиш қобилияти билан боғлиқлигини уқтирди. Жумаладан, у шундай деди: “Мен АҚШдан келиб, бу ерда турли давлатлардан келган ўз соҳасининг машҳур профессорлари билан бир сафда туриб ишлаётганлигимни ўзимга шараф деб биламан. Талабаларимиз дунё бўйлаб ҳар бир мамлакатда самарали ишлаши мумкин. Барча ютуқларимиз асосида профессор Абдуллаевнинг фаолияти турибди. Усиз булар мумкин бўлмасди”.
“Science and innovation” халқаро илмий журнал бош муҳаррири Бахтиёр Рустамов сўзга чиқиб, SIUT ташкил этилганлигининг тўрт йиллиги билан жамоани табриклади. Қисқа вақт давомида университет мамлакатимиз илм-фан ҳаётидаги энг нуфузли танловлардан бири — “Science and Innovation Awards – 2025” танловида “Йилнинг энг инновацион университет” номинациясида олий мукофот билан тақдирланганлигини катта ютуқ сифатида таърифлади. Бундай ғалабанинг манбаи жамоада ўз касбининг усталари, юқори даражадаги профессионаллар йиғилганлиги ва ана шундай жамоани шакллантира олган профессор Юсуф Абдуллаев ўрни ва роли ўзига хос эканлиги таъкидлади.
Дарҳақиқат, мамлакатимиздан ташқарида ҳам кенг илмий доираларда маълум бўган Юсуф Абдуллаевнинг таклифига лаббай деб жавоб берган жаҳоннинг 18 та мамлакатидан PhD ва ундан юқори илмий даражаларига эга 50 дан ортиқ профессор-ўқитувчи ва мураббийлар билан иш бошлаганлиги SIUT муваффақиятли ривожланишининг асосий омилларидан бири сифатида тан олиниши айни ҳақиқатдир.
Тантана доирасида SIUT Васийлик кенгаши раиси Бахтиёр Фазиловнинг университет жамоасига йўллаган табригини компаниялар гуруҳи бош директори ўринбосари Хуршед Ҳожиметов ўқиб эшиттирди. Мактубда университетнинг қисқа муддат ичида эришган ютуқлари юқори баҳоланиб, таълим даргоҳининг келажак пойдевори сифатидаги ўрни алоҳида таъкидланган. Табрикда, университет профессор-ўқитувчилари ва ходимларининг ҳамжиҳатликдаги меҳнати туфайли бу ерда энг юқори стандартларга жавоб берадиган замонавий таълим муҳити шакллантирилганлиги алоҳида уқтирилган. Бу ютуқлар асосида ҳурматли ректорнинг улкан хизматлари турганлигини Х.Ҳожиметов алоҳида қайд этди.
Барча чиқишларда, хорижлик олим ва жамоат арбобларининг онлайн табрикларида Самарқанд халқаро технология университети ютуқлари кўп марталаб тилга олинди ва эътироф этилди. Бу ким томондан қандай қабул қилинади билмадим-у, аммо барча университет ютуқларини, Ўзбекистон учун ўта сув ва ҳаводек зарур бўлган муҳандислар тайёрлашда астойдил киришган ва самарали натижалар кўрсатаётган ғалабалар таъсисчи компаниянинг қўллаб-қувватлаши ва ректор Ю.Абдуллаевнинг ташкилотчилик қобилияти натижаси эканлигини тан олмасдан иложимиз йўқ!
Университет тўрт йиллиги муносабати билан ўтказилган тантанали йиғилиш ҳақида батафсил қуйидаги ҳавола орқали танишиш мумкин:
Тошпўлат Раҳматуллаев
ФОТО: SIUT Матбуот хизмати
